Azərbaycan Banklar Assosiasiyası (ABA) və beynəlxalq ödəniş texnologiyaları şirkəti “Visa Inc.” birgə təşkilatçılığı ilə 24-25 may 2025-ci il tarixlərində Şəki şəhərindəki “Marxal Hotel Sheki” mehmanxanasında komanda quruculuğu tədbiri təşkil olunmuşdur. Tədbirin əsas məqsədi rəqəmsal ödənişlər sahəsində əməkdaşlığın möhkəmləndirilməsi, fırıldaqçılıq əməliyyatlarına qarşı birgə mübarizə imkanlarının müzakirəsi və iştirakçılar arasında komanda ruhunun inkişaf etdirilməsi olmuşdur.
Tədbir zamanı “Visa Inc.” tərəfindən ABA və ABA-ya üzv bəzi banklar müxtəlif nominasiyalar üzrə mükafatlandırılmışdır. Bu təltiflər bankların innovativ yanaşmaları və təhlükəsiz ödəniş sistemlərinin tətbiqində göstərdikləri nailiyyətlərə əsasən təqdim olunmuşdur.
Qeyd edək ki, ABA mütəmadi olaraq üzv banklar, Ekspert Qrupları və tərəfdaş qurumlarla birgə forumlar, seminarlar, müsabiqələr və digər inkişafyönümlü tədbirlər təşkil edir. Bu tədbir də sektorda əməkdaşlıq və bilik mübadiləsinin təşviqi baxımından mühüm əhəmiyyətə malikdir.
