Bildiyiniz kimi, Azərbaycan Banklar Assosiasiyası (ABA) tərəfindən 13-14 iyun 2023-cü il tarixlərində Azərbaycan Respublikasının Mərkəzi Bankının dəstəyi ilə ənənəvi FİNTEX SAMMİT 2023 (MALİYYƏ VƏ TEXNOLOGİYALAR EXPO): “Bank və maliyyə ekosistemində yeni trendlər: innovativ həllər, fintex və təhlükəsizlik” tədbiri keçirilmişdir. Sammit çərçivəsində 3 yan tədbir təşkil edilmişdir.
Bunlardan ilki, 12 iyun 2023-cü il tarixində ABA və dünyada maliyyə institutlarına təhlükəsiz, standartlaşdırılmış, etibarlı mühitdə maliyyə əməliyyatları üzrə ixtisaslaşan “SWIFT” şirkətinin birgə əməkdaşlığı çərçivəsində “Bulud Alyansı” (Alliance Cloud) mövzusunda baş tutan vebinar olmuşdur. Vebinarın spikeri Avropa, Rusiya, Qafqaz və Mərkəzi Asiyadakı banklara infrastrukturun təkamülünə dəstək verən və “SWIFT” şirkətinin baş həll memarı (Senior Solution Architect) Olivier Verbanck olmuşdur. Onlayn görüş zamanı “Bulud Alyansı”nın əsas funksiyaları, həmçinin onun Azərbaycan banklarına etibarlı və sərfəli bağlantı qurmağa necə kömək edə biləcəyi məsələlərinə toxunulmuşdur.
Digəri, 13 iyun tarixində tədbirin Baş Sponsoru – Azimut Təchizat MMC şirkətinin İT və Təchizat peşəkarları üçün Tayvanın ACER şirkətinin məhsul və həllər meetup-təqdimatı keçirilmişdir. “The best is yet to come” sloqanı altında keçirilən 2 hissəli meetup-da 100-ə yaxın bank, pərakəndə şəbəkələri, dövlət qurumlarının nümayəndələri iştirak etmişdir.
Son olaraq, 14 iyun tarixində Azərbaycan Bank Tədris Mərkəzi və Türkiyənin “Projera” şirkətinin birgə təşkilatçılığı ilə “Agile idarəetməyə keçid prosesi üzrə Türkiyə təcrübəsi” mövzusunda seminar keçirilmişdir. Seminarda “Agile” və “Scrum”un banklarda transformasiyaya verdiyi töhfə, Türkiyə banklarında uğurlu çevik transformasiya prosesləri, çevik liderlik kimi mövzulara toxunulmuş, bankların (ING Bank, Ziraat Katılım, Kuveyttürk və s.) və digər qurumların (Turkcell, Architecht və s.) təcrübələri paylaşılmışdır.
