“2018-2020-ci illərdə Azərbaycan Respublikasında rəqəmsal ödənişlərin genişləndirilməsi üzrə Dövlət Proqramı”nın icrası çərçivəsində ölkədə mövcud elektron ödəniş xidmətlərindən istifadənin genişləndirilməsi məqsədilə nəzərdə tutulan tədbirlərdən biri də aşağı gəlirli əhali qrupları üçün ödənişsiz “Baza bank xidmətləri paketi”nin tətbiqinin təşviq edilməsidir.
Beynəlxalq təcrübədə maliyyə inklüzivliyinin gücləndirilməsi, maliyyə xidmətlərinə çıxış imkanı olmayan və ya aşağı səviyyədə olan, habelə maliyyə xidmətlərinə çıxış imkanı olsa da, bu xidmətlərdən cəlbedici olmaması səbəbindən istifadə etməyən əhali qrupu üçün bu xidmətlərdən istifadəyə cəlb olunması məqsədilə banklar tərəfindən “Baza bank xidmətləri paketi”nin tətbiq edilməsi təcrübəsi geniş yer alır. Daha güzəştli formada xidmət haqları tətbiq edilən “Baza bank xidmətləri paketi” aşağı gəlirli əhali qrupuna daha sərfəli şərtlərlə maliyyə xidmətlərindən istifadəyə imkan verir.
“Baza bank xidmətləri paketi”nə daxil edilən aşağıdakı xidmətlərin ödənişsiz təqdim edilməsi məqbul hesab edilir:
1. müraciət edən aşağı gəlirli əhali qrupuna daxil olan şəxsə milli vayutada cari hesabın açılması;
2. cari hesaba bağlı əməliyyatların aparılmasına imkan verən bir ədəd debet ödəniş kartının təqdim edilməsi;
3. mövcud olduqda bankın elektron bankçılıq xidmətlərinə (internet və mobil) qoşulması;
4. ay ərzində cari hesaba yaşayış minimumu həcmində vəsaitinin mədaxil edilməsi;
5. ay ərzində bankın ölkədaxili ekvayer şəbəkəsində yaşayış minimumu həcmində nağdlaşma əməliyyatının aparılması;
6. SMS və ya elektron poçt üzrə məlumatlandırma sisteminə qoşulması;
7. cari hesab üzrə aparılmış əməliyyatlar üzrə elektron çıxarışın təqdim edilməsi;
8. ay ərzində cari hesab vasitəsilə yaşayış minimumu həcmində ölkə daxili köçürmə əməliyyatının aparılması.
